Röörig Skuul- jungen wiar dit

fan Renate Schneider

Küstensjuts es jaa fuar üüs nönt Niis. Di Stifting fuar Küstensjuts jeft dit nü al sent 2007. En wat döör di Stifting Küstensjuts al ales maaket uuren es, ken em rundom üüs hiili Ailön se. Wü weet jaa, dat döör di Storemer langsen weder Lön ofrewen uur en diar trat da di Küstensjuts iin sa üs ön Kairem bi Klef en uk ön Kaamp di Dik bi di Fügelkui saniaret waar. Man dit sen di Aarbern, wat döörföört uur. Aliksa wichtig es dit, dat di Liren liir me di Sjuts fan üüs Küst en sa fan üüs Itüüs omtögungen. En dit bigent jaa bi di Jungen. Wan ja eeder liir ken´s dit jit, wan ja Wuksen sen. En dit es jaa di Generatsjoon, wat eeder üs diarfuar sörigi mut, dat ales önerhölen bleft. Sa fuan ik dit en gur Idee, dat di Skuuljungen al diarüp henweeget uur, wat Küstensjuts es. En dit ek bluat ön di Klas ön Skuul. Naan, hat waar fan di St. Nicolai-Skuul ön Weesterlön fan di fjaarst Klas Kraft en Gedüür önweent! Jen Week wiar ja nü ek di Iiröner ön di Klas, ja wiar büten bi Strön ön Kaamp ön´t aarberin. Ja seet jir nü fliitig en Plankwark, wat di Sön fasthual skel áp. En ja her fuul Spaas diarbi aur ja jaa wust, dat ja wat maaki, wat tö dit Bihualen fan jaar Itüüs, üüs Ailön tiinet. En hat wiar uk wes ek sa lüngwiilig üs ön di Klas teenk ik. Wü wiar uk jer lewer büten. Tömenst nem ja düchtig wat me en bigrip uk beeter, hurom dit bi di Küstensjuts gair. Tja, fuarslain waar dit bi ali Skuulen. Interesiaret wiar man bluat di Grünskuulen üs dit jit. Man ik teenk, uk di hooger Skuulen skul jam jens me desjirem Teema ütarküder seet, aur Küstensjuts gair üüs ali ön!